A KIDOPHUAI HUN HI TA EI; NGAIHSUTHUAI HILO MAW?
Tu hun teh........
*Makai taktak tawm in, makai nengneng tam mahmah se hi. Makai nuam leh thunei nuam kitam napi mawhpuakna thudon loin thuneihna bekin deih in a mawhpuakna zo lo leh thuneihna pua lah kitam mahmah hi.
*Pasian nasem sia taktak tawm in, sia nengneng tam hi. Pasian adingin nasep tam loin amau mimal meetna ding hanciam bek a nasem tam mahmah ta hi.
*Kiniamkhiatna a gen nuam in, a nuntakpih ding haksa hi. Itna om lojna mun ah kiniamkhiatna omna ding mun awng zo ngei lo hi.
*Panmun khat peuh na ngah ciangin na lawm na gual ten hong eng dingin ngaihsun pah ken! Na tungah mawhpuakna lianpi kinga hi cihna ahih manin nasep na siam kei leh na haina a kilat khiatna ding hi zaw ding hi. Na thumanna, na thuman lohna leh na citlahna kilant khiatna ding na hi zawsop hi.
*Sepkhiat ding leh ngimna hoih gen hat man leh mut siam man, sum leh thatang hat man bek tawh mee tang (vote) kaihkhop zawh thu tawh makai ngahte na zahtakhuai masa het lo hi. A sepkhiatna uh a hoih man leh a thumanna uh hangin mee tang ngah zo makaite zahtakhuai leh muan tak zaw hi.
*Pawlpi kim khatte ah khawk uk makai nangawn kiphasak thei uh hi. Mawhpuakna sangin thuneihna bek deih mi kitam mahmah hi. Mawhpuakna la ngam kitawm mahmah napi-in minphatna leh pahtawina bek a lamen leh lunggulh kitam mahmah sese hi.
*By law (thu bullet) a nei lo/a zang lo ahih kei leh a bawlpha kikkik, zuunpha kikkik in a laihsuk laihto den pawlpi in Jesuh' lim leh meel suun ngei loin kigamla semsem uh a, Jesuh' mel hemsak semsem uh hi.
*“Pasian thumang un," cih sangin, "Makaite thu mang un,” cih a tam zawkna pawlpite ah mipite nungtolh hi. Pawlpi lutang pen Khris hi napi-in, pawlpi lutang makaite tungah koih in, political society ah gam leh minam vai ki-ukna leh kivaihawmna (political administration) ah thuneihna lianpen nei leh a to (master) mipite hi napi-in makaite (political leaders) in thuneihna khempeuh la-in kumpi (king or monarch) a suah ciangin pawlpi leh political society sung puahkhamna ding baih mahmah a, pawlpi sung leh society sungah kilemna om ngei lo hi.
*A khangmoi lua pawlpi makai a tamna mun-ah mipite khamuang zo lo uh hi. Pawlpi hat lua ding deih in i hat pai luat ciangin tuk ding baihlam mahmah hi. (I tun nopna mun tung baih nuam loin i hat pai/tai luat ciangin muktuk ding a baihlam mahmah tawh kibang hi)
*Pawlpi kim khatte ah upate in a muhdah pawl khatte a gawina leh gawtna dingin mun dang leh pawl dangte panin sia khatpeuh cialin mipi kawk ding leh khetphim dingin zang thei uh hi.
*Mi pawl khatte in a lawmte panmun deihsakin seh uh a, amah kiseh nuam lo hi. Ahih hangin ama'n a ngah ciangin a deihsak mite pia ngam tuan lo zel hi. Thuneihna a ngah khak ciangin a bup lak gai nuam pah vokpi' sa hawm banga sa hawm pawl khat om hi.
*Pawlpi kem pawl khat pen mipite tungah kingeksak thei uh a, a kikhoppih ding inn khat leh inn nih a om peuh leh lungmuang pah in a tuute don nawn sese loin om hiithiat thei lel uh hi. Jesuh' lungsim a deih pawlpi in Jesuh lungsim bang nei kim tuan lo hi.
*I deih khempeuh ngah ding hi loin sepkhiatna leh hanciamna tawh ngah loh kiphamawh hi. Gen hat man leh deih luat man leh lunggulh man a ngah zawh ding hi tuan lo hi. Deih i hauh mahmah hangin thukham tawh kituakin ngah zawh ding leh thuman tawh ngah dinga kilawm om a, thukham leh thuman tawh kikalh a ngah zawh ding a om tei sam hangin sawt kimang loin kip zo lo hi.
Pasian in pawlpi kem Siate leh gam makaite khuak hong sawp siang sak kik pelmawh hen!
(Thelnah Patong' laigelh hoih ka sakna teng la-in, kong puahphat leh hoih ka sak bangin pawl khat Kong behlap ahi hi - Thang Khan Lian)
