KHAWMPI SIIM SIA NENGNENG PA' TANGTHU

 

KHAWMPI SIIM SIA NENGNENG PA' TANGTHU

Khua khat ah kum sim khawmpi siim dingin sia nengneng khat zong va kihel hi. A zintunnate un nitak an hong lui uh a, siapa'n zong meh suak dingin a kitawi lai takin a meh a muh teh a sung tawh kituak sa mel lo ahih manin a innteekpa' kiangah, "Zinsang ciangin sa meh buang ta sam lo ding i maw? Khawmpi i hawh ciangin i sung tawh maineu sa kituak dep vial hi ei. No na tua ci uh hiam?" hong ci hi.

Inntekpa zong kisuanglahpipi in, "Khawmpi zindona dingin ak tampi ka na khawi uh hi mah ven sia aw... nang kong zindo khak ding hang uh hi liang hiam akpul hong tung sese ahih manin khawmpi kipat ma-in ka ak neih teng uh pulsih mang khin siksek mawk hi. Nuntak haksat luat manin sa hong kimehpih zo lo ding hi sia. Poi mahmah ei. Kum kik teh ak, vok leh ui na khoi ta nung maw? A pulh khit lohna dingun thungetna tawh hong phawk in."

Siapa: "Khawmpi bei ma-in a bat beek in khat vei lei sawm lo buang maw? Upna leh sepkhiatna kizui lo pen huih a dik lo pumpi bangin a si ahi hi. Sepkhiatna lak khia lopi-in thupha bek a deih nai vua??? Tua loin thungetna ah hong phawk in, hong huh zo lo kha ding hi'ng.. thupha zong hong nusiat zo lo ding hi'ng.

Sa duh a ha thak vilvek den keei sia nengngeng zindo khak ding zong bel a thubaih hih tuak zenzen kei mawk ei. Ak lim takin khoi kinken vo guai thupha na ngah nop uh leh. Ak neih loh manin thupha taanlawh khak ding....

KIDAWM!!! CIAMTEH!!!

@ ZUNs Ciamnuih Correspondent

POLITICS PAI ZIA LEH BIAKNA VAI A KINAIHNA LEH KIBATNA

 

POLITICS PAI ZIA LEH BIAKNA VAI A KINAIHNA LEH KIBATNA

Politics i cih pen ei beh leh bawng; khua leh tui; eima minam bek huai tentanna ding zai lua a, gamgi a nei lo hi zaw hi. Politics ah lungsim picing neite thawl zawhna zai semsem a, leitung bup bek hi loin space leh planets dangte Mars ciang dong ah a thuneihna keek zo uh hi.

Politics ah na thuneihna leh na thawl zawhna a zai ding na deih leh minam dangte leh biakna dangte zong na huai leh thuzawh ahih kei leh huzap zawh (mobilized and influenced) ciang bekin na thuneihna leh thawl zawhna hong zai zo bek ding hi. Nang beh leh bawng; khua leh tui; leh nang biakna kibatpih leh minamte bek na huai lai teng tua sung bekah na thuneihna leh ukna kidiahcip in gol beh ngei lo ding a, vaihawm na siam kei leh na gam neu beh semsem in kibalkekin kitamkham zaw lai ding hi.

Tua mah bangin Khristian hi ing na kicih a, na Khristian mipihte bek huai sawmin, Khristian a suak khinsate lak bekah Lungdamna Thu na tangkopih lai teng Pasian' gam zai beh ngei lo ding a, kha mangthang na mat beh zawh loh banah gam mial na keek beh zo ngei kei ding hi. Na Khristian mipihte na huai siam zawh kei leh tampi khahsuah in na mangthang sak lai ding hi.

Politics ahi a, biakna vai ahi zongin na mipihte leh thu upna lamsang ah na thusan' zia kibatpihte bek na huai lai teng lawi khekhap sunga om uiphuk in tua mun bek leitung sa in a omna panin a ham leekleek na bang den ding hi. Tua dan hi lel ei guai. 🙏

@ Thang Khan Lian #ZUNs reports