HOLLYWOOD AA A KHASIAT HUAI TANGTHU
Aug. 28, 2015: Hih tangthu pen Hollywood tangthu a kigente lak panin a khasiat huai pente lakah khat hi kha ding hi. Ama min pen Sylvestar Stallone ahi hi. Tu-in Hollywood action piahte lak panin a minthang pente lakah khat ahi hi.
Stallone pen limcingte lakah nuntakna hamsa pen pawl hi kha ding hi. Zawng lua ahih manin a zi' suai gu in na zuaksak ngei hi. A zi a gaai lai in bank ah $ 106 bek nei hi. A inn saap ding nangawn pia zo loin a inn panin kihawl khia a, New York khuapi bus station ah zong zan thum na giak ngei hi. ROCKY film a bawlma-in a inn luah man ding leh a ui it mahmah "Butkus" an ding lei nang sum nei lo ahih manin Butkus ngawngah $ 100 cih suangin zu zuakna kongah sawtpi tut pih hi. Little Jimmy kici pan $25 bek tawh leisak a, khitui luangsa in ciah kik hi.
Nipi kal nih khitin Mohammed Ali leh Chuck Wepner boxing kitupna va mu hi. Hihte kitupna a muhkhit nungin a minthang mahmah ROCKY movie tangthu gelh ding a lungsim ah hong om hi. Nai kal 20 sung gelhin zo ziau hi. A tangthu gelh zuak ding leh amah mahmah kihel a piah ding cih ngaihsut hi. Ahih hangin studio khatin amah kihel loin a tangthu bek $125,000 in lei sak nuam hi. Stallone in ROCKY film sungah a tangval (main actor) ding ut sawnsawn ahih manin a lei nuam studio nei ten limcing minthangsa bek deih uh ahih manin, "Nang pen na meel limlim nuihzak huai a, na pau zia limlim zong nuihzak huai hi," cih sanin nusia uh hi. Nipi kal sawt loin hih studio ten a tangthu bek $250,000 tawh lei dingin dawp leuleu uh hi. Ahih hangin amah kihel lo ding ahih manin na phal lo hi. Tua khit nungin a studio nei ten nang ong deih lo hi ung, na tangthu gelh bek deih hi ung ci'n a tangthu bek $ 350,000 piak ding ciamin va dawp kik leuleu uh hi. Aman kei zong tua khui-ah ka pan bek tham loin a tangval in pang nuam ing ci'n na nial kik hi. Sawtpi a kinial khit nungun a studio nei ten a tangthu $35,000 piak ding leh Stallone pen ROCKY piah sak dingin phasa uh hi.
ROCKY film a bawlna uh-ah million 1.1 bei a, ni 28 sungin zo uh hi. November 21,1976 in kikhah khia hi. Box office ah $ 225 million ngah zo hi. ROCKY film a sum kingah lak panin 10% bek Stallone tungah kipia hi. ROCKY film in Oscar Award ah Best Picture, Best Directing leh Best Film Editing a ngah banah Stallone in BEST ACTOR nomination ngah sawnsawn hi. Tua banah American National Film Registry ah 'one of the greatest movies ever' ci'n kiciam lai sawnsawn hi.
ROCKY tangthu a zuakna panin a sumngah tawh a masa penin a it mah a ui zuaksa lei kik dingin kithawi pah hi. A zuakna mun, tua zu zuakna kongah ni thum sung va ngak hi. A ni thum ni in a zuaknapa tawh kimu kik nawn hi. A sum giautau luat man leh a inn saap ding a piak zawh loh banah, a ui nangawn an a vak zawh loh manin a zuakna thu lim takin gen hi. Tua banah a tate ton pihin, a ta ten a ui uh a itna gen ngaungau kawmin, "Nang nipi kal bang zah hiam bek kem pan hi lel teh...hehpihna tawh ong leisak kik ta peuh in," ci'n thum ngaungau hi. Ahih hangin a ui zuakna pan na vuak sawmin, phal lo hi. $100 ong pia ning a cih leh ut lo a, $500 ong pia ning a cih hangin ut tuan lo hi. $1000 a piak sawm hangin ut tuan lo beek lo lai ahih manin a tawpna ah $ 25 bek tawh a zuak a ui pen $ 15000 pia in a ui tawh ciah kik uh hi.
Giahna ding nei loin New York bus station ah zan thum giak in, a ui nangawn a vak zo loin a zuakpa tu-in leitung a limcingsiamte lakah minthang pen khat suak a, a neihsa $ 400 million pha hi cin kiciamteh ta hi.
Zawn' pen poi hi. Poi mahmah hi...na mahmah lai hi. Zawng kisa lua in lamet bei tawp dong na tuak ngei hiam? Zawng kisa lua, thanem kisa lua in ka lungsim tamkhamin, zan gawp hi...lametna nei zo nawn keng na ci ngei hiam?
Nuntakna pen hamsa hi, hamsatna tawh kidim hi. Kamphatna in ong paisan den kha thei hi. Mi'n nang hong nial in, na hih theihna bek ong sang ding uh hi. Hau lo, minthang lo na hih manin ong kinuaisiah niloh ding hi. Lametna kong hong kikhaksan lai phial ding hi. Mi'n na thahatna, na sepsate bek ong zatsak nuamin, a haksa pen na nasem ding hi. Nek ding nei loin khua sungah zong na giak kha phial ding hi. Tua bangin na tungah hong tung kha thei mah hi.
Ahih hangin haksatna, nuaisiahna leh simmawhna na thuakte hangin na lametna beisak kha pah kei in. Bangbang a piang zongin lametna leh ngimna kician neih in la, kha suah ngei kei in. Thumanna leh cihtakna na ngawngah awk in, na lungtang tungah gelh in la, na paina peuhah keng in. Khahsuah dingin pammaih lua hi. Na hih zawhna pen kuaman hong theihpih lo a, nang bekin na theih ahi hi. Do dingin galte tam kha ding hi. Do loh phamawh hi. Do lohin gualzawhna piang ngei lo hi. Na tuk hangin tho kik veve in. Mi'n na neihsa, na mel et pan leh na hih theihna zah panin hong simmawh ding hi. Lungkia loin hanciam in do in. Nuntakna pen a hamsat hangin khatvei i do zawh leh a zom zop zawh nuam hi. Thukhual in la, citak in. Thuman in migi in la, hanciamna khahsuah ngei kei in. Tua in daupaina leh lawhcinna thuguk hi. I nuntak hun sung tom lua ahih manin lungkia in, thanem in, lametna beisak a hun mawk beisak ding pen pammaih lua hi.
Zing khuamial penpen a muak dingin zing khuavakin na ngak hi cih mangngilh kha kei in. Na sih dongin hanciam in la, na lametna khahsuah ngei kei in. Nang leh nang na kimuanna na khah suah kei peuh leh zawh loh ding om lo hi. Topa' tha muang in la, citak in hanciam den in. Tua hi leh na daupai in na ma na tun zo ding hi. Gualzawhna in ong ngak den hi cih phawk tawntung in!!!
-Snopes.com/Wikipedia/Nammatv Channel
